جعفر عباس يكتب: كلمة ود حردان بمناسبة شعبان

سلام عليكن أيها الموانطون الكرام، اندهس الفرصة وأبارك لكم صوم شهر شعبان الكريم، وأنا سعيد اليوم بمخاطبة هذه الكوكوة من الشباب حول غضايا الوطن، وأنا سمعان ناس الواستاب والشوال ميديا قاع يقولوا اني كلامي كتير لكن انا بتكلم في كل مناسبة عشان الشباب يستفيدوا، هسع لو أنا ما قلت للناس ان حجر العسل من الأحجار الكريمة في زول كان جايب خبر؟ ناس كتار كانوا قايلين انها من الأحجار البخيلة، وبعدين ما تنسوا اني ومعاي ناس كتار كان عمر البشير بيقعدنا قدامو زي الكبابي، وزول فينا بيقدر يفتح خشمو مافي، عشان كدا عندي متأخرات وفروقات كلام، وكمان البرهان مشغول لكن بيسلم عليكم، وهو عايز يستفيد من خبراتي ومارقني مشكورا للربا والتلاف، ورسلني تركيا وأنا الصححت كتب التاريخ وكشفت ان تركيا حكمت السودان في عام 1955، وتاني وداني روسيا والنقعة شغالة في حربها مع كوريا استغفر الله كرواتيا وقلنا ليهم نحرر الفشقة للمرة الخامسة وبعدين نجي نساعدكم
نحن ناس دواس حار وتجارة حار حار، وعشان كدا اسمنا الجغم السريع، وفي ناس بتحاول تشوه سمعتنا ويلبسوا هدومنا ويعملوا جرايم نهب وسرقة تلفونات وشنط البنات بالسواطير والسكاكين ودي حركة ما بتشبهنا، لانه ناسنا بينهبوا ويخطفوا مناطق كاملة بما فيها بالدوشكا والكلاشنكوف، عشان كدا بنقول ليكم لو لقيتو واحد لابس جغم سريع تقبضوه وتسلموه لواحد لابس جغم سريع من الصنف الأصلي، فنحنا ما ناس 9 طويلة، لأني وأخوي الكاشف ناس 2 طويلة وماسكين في الحيكومة لغاية ما نجيب ناس من الكفوات الشابة ونسلمهم الوزارات، عشان يصلحوا البلد والبلد فيها عجز كرهبا 3500 طن متري، والزول الغني يجيب بابور في بيته، والمويه فيها عجز بتاع 900 ميل مربع، لأن الكيزان 30 سنة ما عملوا أي شي مفيد للبلد غير تكوين قوات الجغم السريع وأدوني رتبة فريغ، وأهو ربك رب الخير بقاني في الحيكومة وهسع أنا رئيس لجنة الطوارق الاغتصادية وكونت 11 لجنة: واحدة تسك الدولار وتديهو شاكوش يسقط حجره، وواحدة تجيب عفريتة ترفع الجنيه والبقية تشوف المجالات الممكن قوات الجغم السريع تسترزق منها خصوصا بعد ما بقت عندنا مفوضية للأراضي تابعة لقواتنا العائلية عشان نزرع رز ومكرونة ونحقق الانكفاء الزاتي فيهم وكما قال الحديث “البيان بالعمل”
الوسيغة الكستورية بتدعو لإعادة هلهلة الغوات المسلحة ونحنا هسع شغالين عشان ندمجها في الجغم السريع، ودايرين نعمل توازن جنسيات داخل الجغم السريع عشان التشاديين والماليين والنيجريين ما يبقوا أغلبية وهسع في خانات فاضية عندنا للشباب بشروط مقرية: من سن 14 الى 16 من جندي الى رقيب- من 16-18 من رقيب الى نقيب، من 18- 25 من رقيب الى عقيب، شرطا أي زول داير رتبة زابط يكون كمل سنة سابعة أساس كان علمي كان أدبي، والناس الدايرين يحللونا نقول ليهم: دي دليبة ما عندكم ليها ام بعارة

إضغط هنا للإنضمام لقروبات الواتسب



Leave A Reply

Your email address will not be published.